TO ALL MY BLOG READERS

TERIMA KASIH - شكرا لك - THANK YOU - ありがとうございました - 谢谢您 - Teşekkürler - Mulţumesc - Obrigado

Isnin, 16 Ogos 2010

[R@ntau-Net] MAMBUEK PINUKUIK CARO KAMPUANG

Kueh Pinukuik

Oleh: Rita Desfitri Lukman

[R@ntau-Net] MAMBUEK PINUKUIK CARO KAMPUANG

Assalamu'alaikum Wr. Wb.

Dek sabanta lai mungkin dunsanak ka makan sahur ataupun babuko (tagantung posisi di ateh bumi), Baa kalau baka awak babuko atau parabuang makan sahur jo pinukuik angek-angek ala kampung kito?

Kok bahannyo yo ndak jauah-jauah doh. Nan lah biaso mambuek kue sapik, tantu langsung maliek bahaso bahannyo pun agak mirip.



Kueh Pinukuik.

Foto: ihsan Rita Desfitri Lukman


Bahan nan diparalukan:

+/- duo galeh tapuang bareh
+/- ampek galeh aie putiah (bisa juo pakai santan, tapi kalau pakai santan, beko inyo indak pakai karambia paruik lai doh)
Karambia paruik sabalah nan agak siau/mudo (kalau pakai aie putiah )
Tapai ubi kayu agak 5 karek untuak ka biang (jadi indak usah pakai pengembang geast doh)
Gulo agak tigo parampek galeh atau sasuai salero
Garam agak sa angin atau bara ka taraso, nan biaso ukurannyo agak satangah sendok teh lah jadih
Minyak goreng saketek sakadar maminyak-i kain untuak ma lap atau maminyak-i kuali pamasak


CARO nyo nan biaso diajakan nenek:

1. Amia-amia dulu tapuang bareh jo tapai ubi kayu babarapo lamo, di dalam pitalai atau cambuang sampai manjadi ciek (maaduaknyo jan sabanta bana). Kudian tambahkan aie sambia di aduak-aduak, sudah tu masuakkan pulo gulo, jan lupo maagiah garam. Aduak rato supayo adonan indak bagumpa-gumpa nan istilah induak-induaknyo jan sampai cik kambiangan :)

2. Kalau adonannyo lah agak kental atau alah pas, (salah satu indikasinyo adolah katiko adonan disauak jo sendok lalu dicorohkan baliak, adonan tu ndak jatuah mancoroh co aie minum, indak pulo jatuahnyo balantuang-lantuang mangumpa-gumpa, jadi kental bantuak kuah kalio se lah cukuik tu mah, yo kentalnyo adonan kue sapik lah.

3. Adonan tu diaramkan labiah kurang 5 jam. Lampok sajo jo kain lap basah muncuang pitalai nan baisi adonan tu.

4. Kalau alah diaramkan beberapo jam, dan adonan lah nampak agak mangambang, masuakkan karambia paruik tadi ka dalam adonan. Tapi kalau lah santan nan dipakai, indak aie putiah, tantu ndak paralu pakai karambiak paruik lai.

5. Sasudah karambia paruik dimasuakkan, biakan adonan agak satangah jam lai.

6. Iduikkan api, angekkan cetakan pinukuik nan anti lengket tu, sambia di lap jo saketek minyak makan. (Kalau cetakan atau kuali pinukuik tu sadang dipinjam urang toko, bisa juo pakai kuali biaso, cuma rajin-rajin maminyak-i nyo satiok malatakkan adonan di kuali supayo ndak lakek. Tapi kalau karambianyo rancak, adonan biasonyo otomatis agak baminyak, jadi jarang juo ka lakek di kuali)

7. Ambiak adonan sasendok-sasendok gulai (jan sendoknyo gadang bana), tuangkan ka kuali, baru lampok (tutuik) kuali tu, biakan api ndak talalu gadang. Kalau bagian bawahnyo lah masak, baliakkan pinukuik tu sahinggo nan diateh pulo nan masak.

8. Kalau lah masak, masuakkan ka dalam piriang, lalu foto :)


CATATAN:

a) Kalau bisa, ijan tapuang bareh nan baru batumbuak bana, tapi nan alah agak talatak beberapo lamo, supayo pinukuik labiah mangambang.

(Kalau di ambo dek makan bareh kampuang, labiah suko mambuek tapuang bareh surang. Kalau sadang ndak banyak bana kebutuhan tapuang tu, ambo randam sajo bareh agak sa liter, kudian ambo tirihkan. Kalau lah agak kariang, ambo blender kariang jo blender pa aluih bumbu. Tapi kalau kebutuhan agak banyak, ambo tumbuak jo lasung ketek nan basimpan di suduik gudang. Tapi kalau sadang maleh, pai sabanta ka lapau mambali tapuang bareh nan macam-macam mereknyo lah samo awak kenal, hehe...).

b) Bahan pinukuik di ateh ambo buek ukuran bahannyo jo takaran labiah kurang, sabab rancaknyo dikiro-kiro juo, untuak mambuek adonan nan bisa pas kentalnyo, perbandingan aie jo tapuang beko tagantuang juo jo jenis tapuang bareh nan dipakai, .

c) Karano baaramkan adonan tu agak beberapo jam, kalau ka dibuek untuak pabukoan, rancak di padu adonan tu pagi manjalang tangah hari. Sahinggo sore tingga mamasak, jadi angek-angek tangguang tu disuokkan ka muluik untuak babuko.

d) Tapi kalau pinukuik nionyo palalu kan makan sahur, rancak diaramkan manjalang lalok. Masak pagi-pagi manjalang makan sahur tu.

Salamaik mamasak pinukuik ala kampuang, dan salamaik manjalankan ibadah puaso...

Salam jo Maaf,

Rita D. Lukman

Dikutip dari:-

~dari Palanta R@ntauNet http://groups.google.com/group/RantauNet/~

Source: https://mail.google.com/mail/?hl=en&shva=1#inbox/12a60a795ad71a79


Komen dari salah seorang anggota millis R@ntau-Net.

Sila klik pada gambar untuk membesarkan gambar.

Komen anggota senior millis R@ntau-Net, pak Sjamsir Sjarif dari USA.


Sila klik pada gambar untuk membesarkan gambar.

Komen dari salah seorang anggota millis R@ntau-Net, pak Jupardi.




~dari Palanta R@ntauNet http://groups.google.com/group/RantauNet/~

Tiada ulasan:

CLICK NOW

Tajuk Kegemaran